SE NAN VILAJ DE DYE M LEVE

SE NAN VILAJ DE DYE M LEVE

M pa ka wont di sa

Se nan vilaj la

M aprann g a, ga

Nan fèy malanga

Se nan Vilaj de Dye

Mwen leve ti taktak

E m pa t janm tande

Pèsòn nan kadejak

Mwen te gen chans

Grandi nan yon espas

Ki ba lavi m yon sans

Pou tout lòt enpas

Nan savann kou bò dlo

Anba tout solèy cho

Se te gwo bouk kabrit

K ap fè kòn sonnen bit

Se la m aprann jwe yoyo

Kouri nan koridò, fè lago

Jwe siye kole, fè wolèmen

Ak soperiye sou yon sèl men

M pa ka bliye tèt akribit

Chak dimanch channmas

Pidetwal epòk krismas

Ki ranplase pa ti sourit

Fè blòk ak ti mamit

Pou nou fè fou ak labou

Ki pral kwit bon biskwit

Pou timoun nan tout lakou

Sou tout do kay dal beton

Kap papiyèt, kou lamidon

Se te sèvolan k ap pran pik

Pou depeyize sa k pi apik

Tout ti koridò se te nou

Do tounen, ap boulinen

Awoyo, ap badinen

Pou dekore toupatou

Manman m te machann kenkay

Kèk fwa li konn fè fritay

Akasan, kafe, oswa chokola

Tèlman zòn lan te woulala

Moun te renmen moun

Se te lanmou bò lari-a

Ou te mèt gwo zouzoun

Sekirite w pa t ebranle lè swa

Sèlman nan plen lan nwit

Chat te konn rele timoun

Epi kout mò Latibonit

Pou tripotay ak sou moun

Kèk bal te konn sonnen

Zòn bwat chèn, gran chemen

Sitou bò Pòtay Lewogàn

Men jamè rive kay Antwàn

Mwen te fè kindègadenn

Tou pre Teyat Nasyonal

Se te yon paradi nasyonal

Li ta tankou jaden Edenn

Site Letènèl te an pè nèt

Menm anba, bò site Plis Kat

Ou pa t konn bezwen linèt

Ni janm mache an kat pat

Se nan ri Charewon

Nou benyen lido-lido

Lè pou nou bwè dlo

N ale nan tiyo kay Nason

Petèt kèk fwa tou

Moun mouri bò lanmè-a

Men se bagay douvanjou

Paske timoun pa p wè sa

Mwen sonje mang

Tif, sirik ak krab mazòrèy

K ap kouri sou gang

Nan labou, anba solèy

Mademwazèl k ap vole

Ak papiyon byen dekore

Chodyè bouyon kay Pitèsya

Ki fè chak nèg yon sipèsta

Gade televizyon bò lari

San grate tèt jiska minwi

Oswa al gade taykonndo

Ti pope twal dèyè rido

Kote Payito, Meyè ak Bètoni

Madan Kayèl, Jid ak Titit Bondye?

Souvni yo anpil, nou pa ka bliye

Zanmi Makis, Doudou ak Feri

Lè lapli tonbe, pou n ap glise

Desann sou vant sou tout glasi

Jou ale, jou pa tounen. Èske se vre

Vilaj la transfòme nan chire pit ak move souvni?

Hm…!

SE NAN VILAJ DE DYE M LEVE

Powèt Wilsonn Telimo Lwi